വിമാനത്താവള ലഗേജുകളിൽ ചോക്കിന്റെ പാടുകൾ കണ്ടിട്ടുണ്ടോ? നിങ്ങളുടെ ലഗേജിൽ പതിഞ്ഞിരിക്കുന്ന പാടുകൾ കസ്റ്റംസിന്റെ രഹസ്യ കോഡാണെന്ന് അറിയുക; വിശദാംശങ്ങൾ വായിക്കാം

വിദേശയാത്ര കഴിഞ്ഞെത്തുന്ന പല യാത്രക്കാർക്കും തങ്ങളുടെ ലഗേജ് ബെല്‍റ്റില്‍ എത്തുന്നതിനു മുൻപ് തന്നെ കസ്റ്റംസ് ഉദ്യോഗസ്ഥരുടെ നിരീക്ഷണത്തിലാണെന്ന കാര്യം അറിയില്ല.ഇന്ത്യൻ വിമാനത്താവളങ്ങളില്‍, ലഗേജ് വിമാനത്തില്‍ നിന്ന് ഇറക്കുമ്ബോള്‍ എക്സ്-റേ പരിശോധനയ്ക്ക് വിധേയമാക്കാറുണ്ട്. ഈ പരിശോധനയില്‍ സംശയാസ്പദമായ എന്തെങ്കിലും കണ്ടാല്‍, ഉദ്യോഗസ്ഥർ ബാഗുകളില്‍ ചോക്ക് കൊണ്ട് രഹസ്യ അടയാളങ്ങള്‍ രേഖപ്പെടുത്താറുണ്ട്.

ഈ അടയാളങ്ങള്‍ കേവലം ചോക്കിന്റെ പാടുകളല്ല, മറിച്ച്‌, കസ്റ്റംസ് ഉദ്യോഗസ്ഥർ പരസ്പരം കൈമാറുന്ന സുപ്രധാന കോഡ് സന്ദേശങ്ങളാണ്.

ചോക്ക് കോഡുകള്‍ക്ക് പിന്നില്‍

യാത്രക്കാരുടെ സാന്നിധ്യത്തില്‍ ഏതൊക്കെ ബാഗുകള്‍ തുറന്ന് വീണ്ടും പരിശോധിക്കണം എന്ന് തീരുമാനിക്കാൻ ഈ അടയാളങ്ങള്‍ കസ്റ്റംസ് ടീമിനെ സഹായിക്കുന്നു. ഈ രഹസ്യ ചിഹ്നങ്ങള്‍ വിമാനത്താവള സുരക്ഷയിലും കസ്റ്റംസ് പരിശോധനകളിലും നിർണായക പങ്ക് വഹിക്കുന്നു.

• ‘X’ അടയാളം: ‘എക്സ്’ എന്ന് അടയാളപ്പെടുത്തിയ ബാഗുകള്‍ക്ക് കസ്റ്റംസ് ഓഫീസർമാർ കൂടുതല്‍ പരിശോധന നടത്തേണ്ടതുണ്ട്.
• ‘A’ അടയാളം: ‘എ’ എന്ന് രേഖപ്പെടുത്തിയ ബാഗുകള്‍ ബാഗേജ് കറൗസലില്‍ ഏറ്റവും അവസാനമായി പുറത്തിറക്കാൻ വേണ്ടി മാറ്റിവെക്കും. ഇത്തരം ബാഗുകളുള്ള യാത്രക്കാരെ പരിശോധനയ്ക്കായി കസ്റ്റംസിലേക്ക് നേരിട്ട് കൊണ്ടുപോകും.
• ‘C’ അടയാളം: ‘സി’ അടയാളം എന്നാല്‍ ബാഗ് തുറന്ന് നേരിട്ട് പരിശോധിക്കണം (Manual Inspection) എന്നാണ് അർത്ഥമാക്കുന്നത്.

ഈ രഹസ്യ ചോക്ക് മാർക്കിംഗുകള്‍ വിമാനത്താവളത്തിലെ കസ്റ്റംസ് ഉദ്യോഗസ്ഥർക്കുള്ള സിഗ്നലുകളാണ്.

ഭയം വേണ്ട, ജാഗ്രത മതി

നിങ്ങളുടെ ബാഗില്‍ ചോക്കിന്റെ അടയാളം കണ്ടാല്‍, ഉള്ളിലുള്ളതെല്ലാം നിയമപരമാണെങ്കില്‍ പരിഭ്രാന്തരാകേണ്ട ആവശ്യമില്ല. ഇത് കസ്റ്റംസ് ഉദ്യോഗസ്ഥരെ പെട്ടെന്ന് പരിശോധന പൂർത്തിയാക്കാൻ സഹായിക്കുന്നതിന് മാത്രമാണ്. എന്നാല്‍, ബാഗിലെ ഈ ചോക്ക് അടയാളം മായ്ച്ചുകളയാൻ ശ്രമിക്കുന്നത് നല്ല കാര്യമല്ല. കാരണം, ഇത് എന്തെങ്കിലും മറച്ചുവെക്കാനുള്ള ശ്രമമായി ഉദ്യോഗസ്ഥർ കരുതിയേക്കാം.

ചെയ്യേണ്ടത് ഇത്ര മാത്രം

• ശാന്തത പാലിക്കുക.
• കസ്റ്റംസ് ഉദ്യോഗസ്ഥരുമായി പൂർണ്ണമായി സഹകരിക്കുക.
• അവരുടെ ചോദ്യങ്ങള്‍ക്ക് സത്യസന്ധമായി മറുപടി നല്‍കുക, ബാഗ് പരിശോധിക്കാൻ അവരെ അനുവദിക്കുക.

പരിശോധന പൂർത്തിയായാല്‍ യാതൊരു ബുദ്ധിമുട്ടും കൂടാതെ നിങ്ങള്‍ക്ക് യാത്ര തുടരാൻ സാധിക്കും.

ഇന്ത്യ ഉള്‍പ്പെടെ ചില രാജ്യങ്ങളില്‍ ഈ അടയാളപ്പെടുത്തല്‍ സംവിധാനം പിന്തുടരുന്നുണ്ട്. മറ്റ് പല അന്താരാഷ്ട്ര വിമാനത്താവളങ്ങളിലും ചോക്ക് മാർക്കുകള്‍ക്ക് പകരം ബാഗേജ് ടാഗില്‍ മാർക്കർ ഉപയോഗിച്ച്‌ എഴുതുന്നതോ, തിരഞ്ഞെടുക്കപ്പെട്ട യാത്രക്കാരെ പ്രത്യേക കസ്റ്റംസ് സോണിലേക്ക് മാറ്റുന്നതോ പോലുള്ള വ്യത്യസ്ത നടപടിക്രമങ്ങളാണ് പിന്തുടരുന്നത്. രാജ്യത്തേക്ക് പ്രവേശിക്കുന്ന എല്ലാ വസ്തുക്കളും സുരക്ഷിതമാണെന്ന് ഉറപ്പാക്കുക എന്നതാണ് ഈ സംവിധാനങ്ങളുടെയെല്ലാം ലക്ഷ്യം.