ആത്മവിശ്വാസം കെടുത്തുന്ന ആരോഗ്യപ്രശ്നമായ വായ്നാറ്റത്തിന് (ഹലിറ്റോസിസ്) പ്രധാന കാരണം വായയുടെ ശുചിത്വമില്ലായ്മ, ചില ഭക്ഷണങ്ങള്, ചില രോഗാവസ്ഥകള് എന്നിവയാണ്.ദുർഗന്ധമുണ്ടാക്കുന്ന സള്ഫർ സംയുക്തങ്ങള് പുറത്തുവിടുന്ന ബാക്ടീരിയകളാണ് ഇതിന് പിന്നില്.
ദിവസവും രണ്ടുനേരം പല്ലുതേക്കുക. കാരണം, നാലുമുതല് പന്ത്രണ്ട് മണിക്കൂറിനുള്ളില് പ്ലേക്ക് രൂപപ്പെടാൻ തുടങ്ങും. പല്ലുകള്ക്കിടയില് നിന്ന് ഭക്ഷണാവശിഷ്ടങ്ങള് നീക്കം ചെയ്യാൻ ഫ്ലോസ് ഉപയോഗിക്കാൻ മറക്കരുത്. നാവ് വടിക്കുക എന്നത് വായ്നാറ്റം അകറ്റാൻ വളരെ പ്രധാനമാണ്. ബ്രഷിന്റെ പുറം ഭാഗം കൊണ്ടോ ടങ്ങ് സ്ക്രേപ്പർ കൊണ്ടോ നാവിലെ ബാക്ടീരിയകളെ നീക്കം ചെയ്യണം.
ഓരോ തവണ ഭക്ഷണം കഴിച്ച ശേഷവും മൗത്ത് വാഷ് ഉപയോഗിച്ച് വായ കഴുകുന്നത് വായ ഫ്രഷ് ആക്കാൻ സഹായിക്കും. മൗത്ത് വാഷിന് പകരമായി, ബേക്കിംഗ് സോഡ (സോഡിയം ബൈകാർബണേറ്റ്) ചൂടുവെള്ളത്തില് ചേർത്ത് കുലുക്കുഴിഞ്ഞാല് വായിലെ ബാക്ടീരിയകളെ നശിപ്പിക്കാനും ദുർഗന്ധം ഇല്ലാതാക്കാനും സാധിക്കും.
ഭക്ഷണം കഴിച്ച ശേഷം പെരുംജീരകം ചവയ്ക്കുന്നത് ദഹനം മെച്ചപ്പെടുത്തുന്നതിനും വായിലെ ദുർഗന്ധം അകറ്റി ഫ്രഷ് ആക്കുന്നതിനും സഹായിക്കും. വായ വരണ്ടുപോകുന്നത് വായ്നാറ്റത്തിന് കാരണമാകാം. ഇത് ഒഴിവാക്കാൻ ധാരാളം വെള്ളം കുടിക്കുക.
വെള്ളം കുടിക്കുന്നത് വായ നനവുള്ളതും വൃത്തിയുള്ളതുമായി നിലനിർത്താനും ബാക്ടീരിയ അടിഞ്ഞുകൂടുന്നത് തടയാനും സഹായിക്കും. വായവരണ്ട അവസ്ഥ തുടരുകയാണെങ്കില് ഡോക്ടറെ സമീപിക്കുക.
