സൂപ്പർ ലീഗ് കേരളയില് മലപ്പുറം എഫ്സിയുടെ ഹോം മത്സരത്തിനെത്തിയ കാണികളുടെ ആവേശം സാമൂഹിക മാധ്യമങ്ങളില് വൈറലായി.ശക്തമായ മഴയെ അവഗണിച്ച് ഗാലറിയില് തിങ്ങിനിറഞ്ഞ ആരാധകരുടെ വീഡിയോയാണ് ഇപ്പോള് ചർച്ചയാകുന്നത്. സൂപ്പർ ലീഗ് കേരളയുടെ ഔദ്യോഗിക ഇൻസ്റ്റാഗ്രാം പേജില് പങ്കുവെച്ച വീഡിയോ ഇതിനോടകം 56 ലക്ഷത്തിലധികം ആളുകള് കണ്ടുകഴിഞ്ഞു.
കഴിഞ്ഞ ദിവസം നടന്ന മലപ്പുറം എഫ്സി-കാലിക്കറ്റ് എഫ്സി പോരാട്ടത്തിലാണ് ആരാധകർ ഗാലറിയില് ഉത്സവ പ്രതീതി തീർത്തത്. മത്സരം 3-3 എന്ന നിലയില് സമനിലയില് കലാശിച്ചു. കാണികളുടെ ആവേശത്തെ ഉത്തേജിപ്പിക്കുന്ന കമന്റേറ്റർ ഷൈജു ദാമോദരന്റെ വാക്കുകള് വീഡിയോയുടെ ജനപ്രീതി വർധിപ്പിച്ചു. ഇന്ത്യൻ ക്രിക്കറ്റ് താരവും മലപ്പുറം എഫ്സിയുടെ ഉടമയുമായ സഞ്ജു സാംസണ്, കേരള ബ്ലാസ്റ്റേഴ്സ് മുൻ താരങ്ങളായ ബെർത്തലോമ്യു ഓഗ്ബച്ചെ, കെർവൻസ് ബെല്ഫോർട്ട് എന്നിവരും ഈ വീഡിയോക്ക് താഴെ കമന്റുകള് രേഖപ്പെടുത്തിയിട്ടുണ്ട്.
